面試，來來去去都係果幾款：

1. 電話面試

嚴格來說其實不叫「面」試，不過未聞其人、先辨其聲，個樣冇明星咁靚絕唔係問題，最緊要，係對答大方得體有禮貌！行路食飯有儀態，傾電話亦都講儀態，呢D就叫TELEPHONE MANNER(電話禮儀)喇。

僱主多數會先以你哋最精通嘅廣東話同你傾幾句，見你應對斯文，先會試埋你英文；如果同你講兩句你已經晦晦氣氣，咁就……，拜拜先，唔該晒！

講到我哋冇咁熟嘅英文，其實僱主都知不能要求個個「喇喇聲」，但起碼唔好一聲唔出不知所措騰晒雞試都唔試用英文答返人吖嘛！最近就係試過有D學員喺電話對答環節因為唔肯試用英文回答，咁就連去面試嘅機會都冇，呢個係老闆同返我哋講嘅。

2. 小組討論

有時見工人數眾多，僱主會安排以小組討論形式面咗一次試先，部分學員對此應該都唔陌生，考中英文口試有時都要咁樣。呢D環境，老闆會坐在一旁叫你哋討論某D話題，例如「今時今日的好客之道」或者比個案例考吓你哋會點樣面對客戶D投訴。其實老闆並無期望你諗到D絕世好橋，呢D之後都會有培訓架啦！反而佢哋多數想睇吓學員敢唔敢表達自己同埋識唔識同人合作。有D人去到呢個環節，竟然唔講野，唔知係咪想慳返D口水可以飲少D水。老闆見到咁，心中唯有對佢哋講聲：OUT！

3. 個人面試

有D學員去見服務業D工，話見工者都唔知係咪睇佢唔起，態度好似好囂咁，一係就唔多出聲。學員對此會有不同反應，有D會忍同埋KEEP住有禮貌地微笑、有D都會忍，不過一出門口就破口大罵、有D再嚴重D就會比返面色個老闆睇。咁你話，邊個會勝出？邊個會眾望所歸、冇得留低？

面試失敗唔駛怕！最怕係唔知點樣改善，今次多得老闆教路，簡直係塞錢落袋，青見學員袋穩！袋穩！